Një 28 vjeçar është arrestuar ditën e sotme pasi vodhi një banesë në Cërrik, e pas saj tentoi të vidhte e një banesë tjetër.
Xh.S., 28 vjeç, banues në Shushicë të Cërrikut, arriti të vidhte 420 euro në banesën e një 67 vjeçar. Më pas tentoi të vidhte në një banesë tjetër, por u kap në flagrancë nga policia.
28 vjeçari nuk është emër i panjohur për autoritetet, pasi është dënuar e më parë për vjedhje, lëndë narkotike dhe armëmbajtje pa leje.
Njoftimi i Policisë së Shtetit:
Cërrik
Vodhi një shumë parash në një banesë dhe më pas tentoi të vidhte në një banesë tjetër, kapet dhe vihet në pranga 28-vjeçari.
28-vjeçari, i dënuar më parë për vepra penale në fushat e vjedhjes, narkotikëve dhe armëmbajtjes pa leje.
Komisariati i Policisë Cërrik, pas marrjes së denoncimit për vjedhjen e një shume parash në një banesë, në fshatin Shushicë, Cërrik, ka organizuar punën për kapjen e autorit dhe vënien e tij përpara përgjegjësisë ligjore. Si rezultat i veprimeve të shpejta hetimore dhe procedurale është identifikuar, kapur dhe vënë në pranga shtetasi Xh. S., 28 vjeç, banues në fshatin Shushicë, Cërrik.
Ky shtetas dyshohet se mëngjesin e djeshëm, ka vjedhur 420 euro në banesën e një 67-vjeçari. Një pjesë e parave u gjet dhe u sekuestrua në cilësinë e provës materiale.
Gjithashtu, nga veprimet hetimore dyshohet se ky shtetas, pasi ka kryer këtë vjedhje, ka tentuar të vjedhë edhe në një banesë tjetër, në fshatin Shushicë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.
